Thodine Romanes anda e Purani Grekisko Shib (MRY)
Ande purani Grecja, but but bersh angle, trayilas ekh vestime paramichári ke busholas Esopo. Vo phenelas leske paramícha, kay butivar le zhigenya ai le manush den duma andekhthan, káshte sikavel le manushenge le lashe droma le trayoske. Phendyas vo but but paramícha, ay aver manush astarde te ramon len. Kadala si nishte anda kodola paramícha, thodine Romanes.
O ZHUKEL AY O RUV
Sas pe ke nas pe, sovelas ekh zhukel pasha ekh kher. Anklisto anda o vesh o ruv ai kana dikhlia le zhukles, dia les o gi te xal les. Kana sas te perel po zhukel, kado tsipisardias anda sa o máho ay phendias:
"Na murdar ma, ruva, rudiv tut, akana ke dikhes ke sim kadia sano, sa kókalia ai morki. Te azhukeres niste dies, muro xolay site kerel baro abiav, ai me si te xav but but, bínelo, zhi pun chi chaylov, ai kadya si te avav may thulo te xas ma vi may mishto".
O ruv ashundia o diváno le zhuklesko, gindisailo ekh tsigitsa, ay kerdias sar manglia les o zhukel, gelotar.
Nakhle niste dies ay avilo may ekhdáta o ruv, ke arakhlia le zhukles suto opre o kher. Ashada pe o ruv kote, ka o kher ay astardias te akharel le zhukles:
"De tu godi so diam duma may anglal, kana mukhlem tut impáchi. Me avilem te xav tut akana ke san may thulo pala o abiav!"
Mothol les o zhukel:
"Azhuker inke niste dies, ruvora, ay te aves may ekhdáta ay arakhes ma suto pasha o kher, kote tele kay san tu akana, aba chi trubul te azhukeres o abiav!"
E paramíchi sikavel ke le manush xarane alyaren kai si le báyuria. Kana skepin pe, zhanen te arakhen pe lendar kanagódi.
O MAGÁRI AY E ÚLPYA
Ekh magári lyas ai thoda pe leste ekh phuri morki orlanoski. Astardias te daravel savoren. Kana dikhlias la ulpyá, dyas les o gi te daravel vi kodola. Kote e úlpya, ke ashundiasas lesko glaso, magarosko, may anglal te uryavel pe la morkiasa, leske phenel:
"Vi me daravas tut, te na ashunavas kiro chacho glaso may anglal!"
E paramícha sikavel amen ke le manush dilivane nashti xoxaven le kolavren , anda kodya ke lengo dilimos purisarel len.
O GAZHO KE O ZHUKEL DANDARDYAS LES
Ekh zhukel dandardia le gazhes, ai kado lya pe te prastal inchal ordal te arakhel kas dastil te sastyarel leski búba. Kana ashundias aver manush, ke sas pashe, só vo kamelas, phendias:
-O! Te kames te sastyos, le ekh kotor manro ay tho pe leste o rat kira bubáko, ai de les ka o zhukel ke dandardias tut.
Asayas o gazho ay phendia:
-Te kerav kodo, atúnchi sa´ l zhukel ando gav si te dandaren ma!
E paramícha sikavel ke kana azhutin le nasul manushes, kado anda yekh astarel te kerel vi may but nasulimata.
LE MAKHIA
Ande yekh láuka dia pe muyal ekh koro avgin. Kana sungaile le makhia, avile dandayekh te xan. Thérdile po avgin ay kote lenge punre astárdile ka avgin. Nashti sas te uryantar, nashti sas te zhantar kotar,
astarde te tason ando avgin, ay tsipinas: a! xaimaske sam pala kasavo xántsi xabe!!!
E paramícha sikavel ke nasul avel kodoleske ke trayil ferdi te xal ay te pel.
KOTOLMÉCHI
O shav le gazhesko pekelas nishte kotolméchi. Kana ashundias sar kiravenas pe pe yag, phendias:
"Che zhungale zhigenya, ke gilaben zhi pun chi phabardyol lengo kher!"
E paramícha sikavel ke si ekh vryáma pe sváko buki.
LE SHOSHOYA
Ekh dies le shoshosya astarde te maren pe le kurungensa. Akharde le ulpyan te azhutin len.
"Azhutisarasas tumen, te na zhanasas kon san tume ay kasa maren tume"
E paramícha sikavel ke kodola ke maren pe kodolensa ke si may zorale lendar, shay xasaren vi lengo skepimos.
O ORSLÁNO, O MAGÁRI THAY E ÚLPYA
O orsláno, o magári ay e úlpya, kerde kumpánya ay gele po vináto. Astarde but but zhigenyan, ay o orsláno manglias le magaros te ulavel sa kodo xabe. O magári kerdias trin kotora, ekhe musurimasa, ai mothodas len:
"Alosaren!"
D´anda yekh dilyaylo xoliatar o orsláno, pelo po magári ai xalya les. Kote, dias porúnko la ulpiake te ulavel o xabe mashkar le donen. Voy thoda sa p´ekh rig, ay mukhla peske férdi ekh tsiritsa. Atúnchi lake mothoda o orsláno:
-Shukarnio, kon sikada tu te ulavel kadia?
Ay phendia e úlpya:
-E bíbaxt le magaroski.
E paramícha sikavel ke ´l manush xarane sikaven pe kata´l bayuria ke peren pe ´l kolavrende.
E KAINI AY E STRUGNYÁLA
E kaini arakhlias nishte anre le sapeske. Tatyardias le mishto, ai ankaladias len. Yekh strugnyála dikhlias la, ay motodia lake:
"Dilio, so pravares kadala saporen? kana baryon, si te rimon sa, ay vi si te xan tut may anglal-"
E paramícha sikavel ke o nasulimos rimol sa.
E KHIR AY E GULÚMBYA
E khir sas trushali. Ulisti ka riéka te pel pay, ai o pay tsirdyas la pa tsermuro. Xaimaski sas, tasolas. Dikhlias la e gulúmbya, lyas ekh krangitsa ai shudyas la karing e khir kashte kídel la, te skepil pe. E khir xutilda e krianga, anklisti opre ay skepisaili. Kote vi sas ekh gazho ke zhalas de vináto, la puskasa. Dikhlia vo la gulumbya ay zumada te mundarel la. Kana e khir vi dikhlias le gazhes, d`andayekh dandardyas les po punro. Tsipisardias kado anda sa o máho, ai shudyas tele e pushka. Ashundyas e gulumbia o glaso le gazhesko ai kote nashlitar, skepisayli.
E paramícha sikavel ke trubul te naysis kodolenge ke azhutin amen.
No hay comentarios:
Publicar un comentario